In sta parte...

Ve farò veder qualche documento storico da el me albero genealogico.

Podè imaginar anca voialtri el numero de documenti racolti da me Pare, Gianfranco, in sti 10 anni de ricerca per documentàr 500 anni de storia Venexiana de li me antenai. Go quindi ciapà in considerassion solo 8 de questi.

​

​

PAR CHI VOL SAVERGHENE DE PIÙ...

El lenguagio de la zente, geri come ancùo, xe na cossa viva che cambia sia nel parlar che ne la scritura.

Questo gera anca de più ne la cità comercial de Venexia, dove se gaveva contato co merchanti e persone de tuto el mondo, fazendo cussì che ne la lengua Venexiana fusse incorporai termini e parole vegnui da altri lenguagi.

La lengua Venexiana, anca se parlada da tutte le classi sociali e in ogni ambito, sia privà che publico, no la xe mai stada codificada ne la scritura.

Per sta razon la se trova scrita in modi molto diversi, fusse per el periodo storico che per chi che scriveva.

Infati, el scritór traduséva li soni de le parole e de li nomi in base alla so istruxion e la so personal interpretaxion, e xe cussì che trovemo la stessa parola scrita in modi diversi.

 Per capirse mègio:

Scola – Schola (corporassion de arti e mestieri)

Zeca – Ceca    (dove se stampa monèa)

 In particolar ne i documenti de i me antenai, trovemo:

Hieronimo-Gierolamo-Gerolamo-Gerolemo

Contraher-Contrazer       (ne le promesse de matrimonio)

Contrada-Contrà

Do-Doi                 (per dir 2)

Cha-Cà                 (per abitassion)

 I cognomi gera dai in base al lógo da dove se vegniva, al mestier fatto, al nome de la famegia nobile dove se lavorava o ne le cui case se gera in afìto.

Xe cussì che el più lontan antenà che cognosso, gera ciamà BURANELO, cioè vegnuo da l’isola de Buran, una de le prime isole de la nostra laguna a vegnir abitada.

In seguito, il me antenai li xe stai identificài col cognome TREVISAN, o anca de CHA TREVISAN, e po’ anca BERLAN, da li cognomi de antiche famege nobili. In altri documenti, li gera identificài col sufisso TREVISAN ditto BERLAN.